Ambasadori amerikan, Jeffrey Hovenier, ka thënë se kjo situatë ka prekur marrrëdhëniet dhe çdo deklarim nga eksponentë qeveritarë se çdo gjë është në rregull, nuk është e vërtetë.
“Ne do të shpresonim që Qeveria dhe kryeministri Kurti do të angazhohen si partner që ta zgjidhim këtë çështje së bashku, në vend se të ndërmarrin veprime të njëanshme dhe të kundërtën e asaj që kemi kërkuar. Jemi të shqetësuar që Qeveria dhe kryeministri Kurti nuk e kanë bërë këtë. Çfarëdolloj deklarimi se gjërat janë në rregull dhe se marrëdhëniet tona vazhdojnë, nuk janë të vërteta. Kjo situatë ka prekur partneritetin tonë. Çdo shpjegim tjetër është keqkuptim”, ka thënë ai.
Ambasadori amerikan tutje ka thënë se papërgjegjshmëria e Qeverisë Kurti ndaj kërkesave të tyre, vë në pikëpyetje partneritetin e ShBA-së.
“SHBA-ja ka kërkuar partneritet nga Qeveria e Kosovës, dhe shprehim keqardhje që qeveria Kurti nuk ka qenë e përgjegjshme ndaj kërkesave tona. ShBA-ja e ka bërë të qartë që nëse kryeministri
Kurti, nuk na trajton neve si partner, kjo vë në pikëpyetje nëse mund të jemi ne partner ndaj kësaj qeverie”, ka potencuar ambasadori amerikan.
Madje, Hovenier e ka quajtur si lëvizje të pamençur mosreagimin e Qeverisë karshi shqetësimeve të shprehura si në publik edhe në komunikime private.
“Është e rrallë që në Këshill të Sigurimit përfaqësuesi amerikan të thotë gjëra kritike për Qeverinë e Kosovës. Ambasadorja Linda-Thomas Greenfield e bëri këtë. Është e rrallë që ndihmës-sekretari për Evropë, James O’Brien, të japë intervistë me tone e kontekst të tillë siç e bëri, është shumë e rrallë. Reflekton për një problem. Shpresa ime është të ndalet kjo. Nuk duam të jemi në këto rrethana. Të gjithë kanë shprehur qartë shqetësimin, duket jo e mençur që Qeveria nuk po reagon”, ka deklaruar ai.
Tutje, Hovenier tha se ShBA-ja ka shqëtësime domethënëse për rregulloren e BQK-së për dinarin.
“Nuk i sfidojmë institucionet e Kosovës për të rregulluar sektorin financiar, nuk sfidojmë institucionet e Kosovës që të ulin rrezikun e pastrimit të parave apo financimin e grupeve terroriste, nuk i sfidojmë institucionet e Kosovës apo BQK-në, por ne vazhdimisht po kërkojmë që të shtyhet zbatimi i Rregullores për një periudhë tranzicioni”, përfundoi ai.
Ambasadori amerikan në Kosovë theksoi përkushtimin e ShBA-së për qytetarët e Kosovës, dhe se pavarësisht të gjithave ata do të jenë në festimet e përvjetorit të Pavarësisë.
