Kryesuesi i Komisionit Qeveritar për Personat e Zhdukur, Andin Hoti, i cili ishte i pranishëm në takimin e Ohrit si pjesë e delegacionit të Kosovës, tha se mbi katër herë është larguar komplet çështja e personave të zhdukur nga aneksi i zbatimit të Marrëveshjes së normalizimit Kosovë – Serbi.
Takimin e 18 marsit në Ohër, Hoti e cilësoi si një nga ditët më të vështira të jetës së tij, përcjell teve1.info.
“Duhet të bëhet një presion më i madh që çështja e të pagjeturve të trajtohet si e veçantë. Nuk them që kemi bërë një arritje. 15 orë kanë qenë goxha të rënda për ne. Mbi katër herë na e kanë larguar komplet çështjen e personave të zhdukur nga aneksi. Kjo ka qenë një sfidë shumë e madhe dhe ndoshta dita më e rëndë në jetën time. Ka qenë një insistim i madh i imi, po ashtu edhe kryeministrit Kurti dhe zëvendëskryeministrit Bislimi. Afati kohor nuk është pranuar nga pala serbe, ballafaqimi me të kaluarën nuk është pranuar nga pala serbe”, deklaroi Hoti në emisionin “Ditari”.
Po ashtu, Hoti vlerësoi që ka pasur mungesë të vullnetit nga Bashkimi Evropian lidhur me çështjen e personave të zhdukur.
“Mua më ka çuditur se si ka qenë një mungesë e vullnetit të Bashkimit Evropian, Lajçak dhe Borrell në këtë rast. Sepse, si është e mundur që ata të lejojnë të largohet çështja e personave të zhdukur, kur vetë BE përbëhet nga të drejtat e njeriut, nga mbrojtja e familjarëve dhe përsëri është larguar katër herë”, shtoi tutje Hoti në Tëvë1.
Më tej Hoti tregoi se si u fut çështja e të pagjeturve në aneks.
“Kurti u ka thënë se pa këtë pikë nuk e pranojmë marrëveshjen”, deklaroi Hoti.
Kujtojmë se palët janë pajtuar për të miratuar Deklaratën për Personat e Zhdukur, siç është negociuar në kuadër të dialogut të ndërmjetësuar nga BE-ja, si çështje urgjente./teve1.info/.
