Kryetari i Komisionit Qeveritar për Personat e Zhdukur, Andin Hoti i është përgjigjur kritikave se termi ‘forcibly dissapeared’ (të zhdukur me forcë) i përdorur në Deklaratën për të Zhdukurit, nuk përdoret në dokumente ndërkombëtare dhe nuk ka efekt, pasi që termi adekuat është ‘enforced dissapearance’ (të zhdukur me forcë).
“- JO, nuk është larguar termi ‘personat e zhdukur me forcë’, e keni në deklaratë veç lexojeni. Për më tepër, edhe për këtë pikë, disa individë flasin sikurse ky term paska ekzistuar dikund këto 24 vite me anë të së ciles Kosova e paska dërrmuar Serbinë nga paditë për krime, dhe ne e paskemi larguar. Ku ka qenë? Kur ka qenë? Të turpshme dhe të pafalshme këto akuza pa bazë”, ka shkruar Hoti.
Sipas tij edhe Gjykata Ndërkombëtare për të Drejtat e Njeriut, por edhe mekanizma të tjerë e përdorin termin ‘forcibly dissapeared’.
“1. Ju lutem referojuni Konventës Ndërkombëtare për mbrojtjen e të gjithë personave nga zhdukja me forcë, të OKB-së;
2. Ju lutem referojuni Gjykates Evropiane për të Drejtat e Njeriut dhe në të gjeni termin identik të njejtë me termin e përdorur në Deklaratë;
3. Ju lutem shfletoni internetin dhe gjeni shembuj të shteteve tjera që kanë përdorur termin e njejtë me deklaraten tonë;”, ka shkruar Hoti.
Hoti ka shkruar se është gabim të thuhet që përmes kësaj deklarate është shfajësuar Serbia.
“JO, nuk është shfajësuar Serbia për asgjë, por është fajësuar për krime ndaj popullit të Kosoves. Për më tepër, me indinjon fakti që disa individë flasin sikurse ne kemi qenë në ndonjë proces gjyqësor me Serbinë, dhe e kemi akuzuar e paditur aq shumë, saqë tash kinse kjo deklaratë e paska liruar Serbinë nga këto akuza. Sinçerisht, nuk e di çfarë paftyrësie duhet të kenë njerëzit dhe të bëjnë akuza të tilla? NE NUK KEMI QENË ASKUND! Ne kemi qenë në pikën 0. As një akuzë të vetmë ndaj Serbisë për të zhdukurit, asnjë dokument të vetëm që e bënë Serbinë fajtore për këto zhdukje deri më sot!”, ka shkruar Hoti.