Deputeti i Lidhjes Demokratike të Kosovës, Avdullah Hoti, tha se pagesat e rrymë për veriun e Kosovës në të kaluarën janë bërë me vendim të Kuvendit derisa tani me vendime tjera, raporton teve1.info
Hoti tha po ashtu se shuma e paguar gjatë muajve të këtij vitit është shumë më e lartë se sa shumat paguara përgjatë viteve 2021 dhe 2022, ndërkohë shtoi se nuk po i shihet fundi këtij trendi.
Përmes një statusi në Facebook, Hoti tha se qeveritarët e sotëm nuk kanë lënë gjë pa bërë në të kaluarën kundër këtyre pagesave, derisa sipas tij, tani paguajnë shumëfish më shumë për rrymën e shpenzuar nga serbët e veriut.
“Nga raportimi i KOSTT-it sot në Komisionin për Buxhet, 113 mil euro janë paguara për energjinë në veri për vitet 2021 dhe 2022. Këto mjete janë paguar nga buxheti i shtetit dhe nga dividenta e KOSTT-it për Qeverinë. Sivjet, deri në shtator, borxhi është rreth 25 mil.
Anomalia qëndron edhe në faktin se në vitin 2021, pagesa u bë me vendim të Kuvendit. Ndërkaq, në vitin 2022 u anashkalua Kuvendi dhe pagesa u krye me vendime tjera.
Qeveritarët e sotëm nuk kanë lënë gjë pa bërë kundër qeverive të kaluara kur ato detyroheshin të bënin pagesat për energjinë në veri. Tani paguajnë shumëfish më shumë dhe nuk i shihet fundi si do të mbyllet kjo çështje”, ka shkruar Hoti.
