Kryeministri Albin Kurti dhe presidenti i Serbisë Aleksandër Vuçiq, pas më shumë se një viti do të takohen në Bruksel.
Por në takimin që do të zhvillohet javën tjetër në ndërmjetësimin e Bashkimit Evropian, ende nuk është bërë e ditur agjenda dhe temat që do të diskutohen.
“Lidhur me takimin e nivelit të lartë në kuadër të dialogut mes presidentit Vuçiq dhe kryeministrit Kurti në Bruksel më 18 gusht, do të publikojmë më shumë detaje rreth tij, përfshirë agjendën, më afër datës kur ai do të zhvillohet”, ka thënë Peter Stano, zëdhënës i Bashkimit Evropian.
Megjithatë, pak javë më herët emisari i BE-së për dialogun Miroslav Lajçak tha se palët janë dakorduar për një marrëveshje për zgjidhjen e fatit të të zhdukurve.
Por në një përgjigje elektronike për televizionin, kryetari i delegacionit të Kosovës për bisedimet për çështjen të pagjeturve, Andin Hoti ka thënë se ende nuk ka një dakordim të tillë.
“Që nga takimi i fundit që kemi pasur në Bruksel si ekip i dialogut, NUK është arritur ndonjë dakordim mes palëve në lidhje me deklaratën për persona të zhdukur. Dhe njëra nga arsyet për këtë është termi persona të zhdukur me forcë [që nuk pranohet të përdoret nga Serbia. Dhe jo, nuk besoj që do të trajtohet kjo temë në Bruksel”, thotë Hoti.
Për Ahmet Grajqevcin, kryetar në Këshillin Koordinues për të zhdukurit dhe krimet e luftës, çështja e të pagjeturve nuk mund të zgjidhet pa një trysni të madhe të Bashkësisë Ndërkombëtare ndaj Serbisë.
“Ky prioritet është nënshkruar në Ëashington mes kryeministrit Hoti që prioritet nr 1 do të jetë çështje e zbardhjes së personave të kidnapuar me dhunë nga forcat policore ushtarake. Dhe ne u bënë veç dy vjet nuk po shohim ndonjë rezultat dhe nuk jemi optimist që mund të bëhet se pa një trysni të madhe të bashkësisë ndërkombëtare Serbia nuk do të tregon as ofron ndihmë rreth këtij procesi”, thotë Grajqevci.
Rreth 1600 shqiptarë rezultojnë ende të zhdukur, për fati ne tyre ende asgjë nuk dihet.
Kronika e realizuar nga gazetari Gojart Jashari.
