Ish-kryeministri i Kosovës nga radhët e Lidhjes Demokratike të Kosovës, Avdullah Hoti, ka thënë se Kosova është një demokraci e re, por që sipas tij, tani e konsoliduar.
Këto pikëpamje ai i tha në hapje të Forumit për Transparencë dhe Monitorim Parlamentar që po mbahet në Tajvan, raporton teve1.info.
Hoti ka thënë se transparenca parlamentare në Kosovë është vendosur përmes mekanizmave që përfshijnë zyrën e OJQ-ve në Kuvend, konsultimet e rregullta të Kuvendit me OJQ, përfshirja e OJQ-ve dhe qytetarëve në përgatitjen e ligjeve, si dhe përcjellja elektronike e gjithë procesit të përgatitjes së ligjeve.
“Theksova se këto arritje janë bërë për një kohë relativisht të shkurtër nga viti 2008, kur Kosova e ka shpallur pavarësinë, e këndej”, ka shkruar Hoti në Facebook.
Hoti ka deklaruar se Kosova ka histori të jashtëzakonshme.
“Kosova ka histori të jashtëzakonshme. Një person në Kosovë, që është i moshës 40-vjeçare, e ka ndërruar shtetësinë katër herë. Në lindje e ka marrë shtetësinë e Jugosllavisë. Mandej, gjatë viteve të 1990-ta e ka marrë shtetësinë e Federatës Serbi – Mali i Zi. Pas luftës të 1998-1999, e ka marrë pasaportën e UNMIK-ut. Dhe, në fund, nga viti 2008, ka pasaportë të Republikës së Kosovës”, ka shkruar tutje Hoti.
Sipas Hotit, Kosova ka bërë progres në ndërtimin e demokracisë dhe transparencës parlamentare.
“Prandaj, duke pasur parasysh gjithë këto ndryshime, Kosova ka bërë progres të jashtëzakonshëm në ndërtimin e demokracisë dhe transparencës parlamentare, si dhe në ndërtimin e një shoqërie aktive dhe demokratike e liberale”, tha deputeti.
