Avdullah Hoti ka reaguar pas shpalljes së rezultateve të zgjedhjeve të parakohshme parlamentare, në të cilat Lidhja Demokratike e Kosovës u rendit e treta, ndërsa ai vetë shënoi rritje të mbështetjes personale.
Në një postim në Facebook, Hoti theksoi se besimi i marrë, i cili sipas tij është më i madh se në zgjedhjet e shkurtit 2025, përbën një obligim për angazhim të mëtejmë në ringritjen e LDK-së.
“Ky besim dëshmon se anëtarësia dhe elektorati i LDK-së kërkojnë forcim të vlerave themeltare mbi të cilat kjo parti është ndërtuar: demokracinë e brendshme, guximin politik, vizionin shtetformues dhe orientimin e palëkundur euro-atlantik. Këto vlera nuk janë kujtim i së kaluarës – ato janë domosdoshmëri për të ardhmen dhe për kthimin e LDK-së në vendin që i takon: në ballë të proceseve demokratike dhe shtetërore të Republikës së Kosovës”.
Ai vlerësoi se rezultati i tij dëshmon kërkesën e anëtarësisë dhe elektoratit për rikthimin e vlerave themelore të LDK-së, si demokracia e brendshme, guximi politik, vizioni shtetformues dhe orientimi i qartë euro-atlantik.
Sipas Hotit, këto parime janë thelbësore jo vetëm për të ardhmen e partisë, por edhe për rolin e saj në proceset demokratike dhe shtetërore të Kosovës.
Duke komentuar rezultatin e përgjithshëm të LDK-së, ai tha se partia ka nevojë për unitet të brendshëm dhe debat të hapur për të ardhmen, me qëllim rikthimin e besimit të anëtarësisë dhe qytetarëve.
Hoti u shpreh se do të vazhdojë të angazhohet në shërbim të LDK-së dhe të Kosovës, duke theksuar se është i bindur se një LDK e bashkuar dhe e udhëhequr me vizion mund të ringrihet dhe të dalë fituese.
