Hoti ka thënë se shpenzimet kapitale të nivelit qendror janë në përqindjen më të ulët ndonjëherë, prej 9 për qind.
Përmes një statusi në Facebook, Hoti ka shkruar se Qeveria i ka penguar komunat në dy mënyra për investime kapitale:
Një sipas Hotit është kërkesa ndaj komunave për bartje dhe ridestinim të mjeteve vetanake dhe dy procedurat e prokurimit,të cilat sipas tij kanë bërë që të humbin muajt e verës, kur edhe është koha optimale për kryerjen e projekteve kapitale.
“Qeveria, përveç që nuk i zbaton projektet e veta kapitale, i ka penguar edhe komunat në dy mënyra:
1. Kërkesat e komunave për bartje dhe ridestinim të mjeteve vetanake kanë pritur me muaj për miratim nga Ministria e Financave, duke humbur muajt e verës kur është koha optimale për kryerjen e projekteve kapitale. Kur janë miratuar kërkesat, është bërë tepër vonë për të kryer procedurat e prokurimit dhe zbatuar ato projekte brenda vitit. Sipas ligjit, është e drejtë ekskluzive e komunave për të vendosur se për çfarë do t’i përdorin të hyrat vetanake. Kërkesat për bartje të të hyrave vetanake miratohen sipas procedurave formale ligjore dhe nuk i nënshtrohen diskrecionit të Ministrit të Financave.
2. Qeveria e ka mbajtur të bllokuar shumë gjatë Organin Shqyrtues të Prokurimit, duke bllokuar shumë projekte kapitale për të cilat ka pasur ankesa. Kjo e ka vonuar edhe më tutje zbatimin e projekteve kapitale qendrore dhe lokale.
Shpenzimet kapitale të nivelit qendror janë në nivelin më të ulët historikisht prej 9%. Ndërkaq, sot në Pejë, Qeveria u kërkon Kryetarëve të Komunave Qeveria t’u bëjnë presion kompanive që të kryejnë punët në terren për projekte që janë të komunave”, ka shkruar Hoti.
