Përmes një statusi në Facebook, Hoti ka thënë se vlera e koeficientit deri në 125 euro i ruan pagat e njëjta siç kanë qenë në dhjetor të vitit 2021.
Derisa sipas tij, çfarëdo vlere nën 125 Euro e koeficientit të pagave në Kosovë nënkupton ulje të pagave.
“Kështu që, për të siguruar rritje reale të pagave prej 10%, si dhe për të kompensuar zhvlerësimin për shkak të inflacionit siç u diskutua më lartë, vlera e koeficientit të pagave duhet të jetë 137.5 euro. [e njëjta përshtatje duhet të ndodhë edhe për skemat pensionale dhe të ndihmës sociale].”, ka shkruar ndër të tjera Hoti.
Sipas tij për shkak të rritjes së çmimeve të produkteve të konsumit të përditshëm, vlera reale apo fuqia blerëse e pagave u zvogëlua gjatë vitit 2022.
“Qeveria nuk i përshtati pagat për normën e inflacionit, e as nuk e rriti pagën minimale. Rrjedhimisht, për pjesën më të madhe të familjeve (që kanë të ardhura vetëm nga paga) standardi i jetës ra për shkak të reduktimit të konsumit”, ka shkruar Hoti.
Ai ka përmendur edhe siç ka thënë pasigurinë me Ligjin e Pagave, i cili edhe pse është shpallur në Gazertën Zyrtare më 5 janar, Qeveria ende nuk e ka caktuar vlerën e koeficientit.
“Rrjedhimisht, askush nuk e di sa do ta ketë pagën në muajin shkurt. Kjo ka krijuar pasiguri tek të punësuarit, pasi shumë prej tyre kanë kredi apo obligime të rregullta mujore. Mos caktimi i vlerës së koeficientit përbënë shkelje të të drejtave të punëtorëve”, ka shkruar Hoti.
