Deputeti i LDK-së, Avdullah Hoti ka bërë thirrje që debati për dialogun, i ndërprerë javën e kaluar, të vazhdojë para takimit të së hënës në Bruksel në kuadër të dialogut.
“Intervenimi im lidhet me debatin që ne kishim për dialog i cili nuk u përfundu. Kryeministri u largu nga seanca pa asnjë njoftim edhe për urgjencën e largimit edhe kur mund të kthehet për ta vazhdu atë debat. Besoj që është e domosdoshme që ky debat të kryhet para së hënës dhe kjo është në interes të kryeministrit për të formalizu qëndrimin e tij të mbështetur edhe me një rezolutë të Kuvendit të Kosovës”, ka deklaruar Hoti në Kuvend.
Hoti po ashtu i ka shtruar disa pyetje lidhur me qëndrimin e Qeverisë për planin franko-gjerman dhe pranimin/mospranimin e Asociacionit.
“Cila ëhtë përmbajtja e plotë dhe finale e planit franko-gjerman, cili është qëndrimi i Qeverisë ndaj këtij plani, përveç deklarimit se është bazë e mirë për t’u negociu më tutje?”, ka pyetur Hoti.
“Cilat vërejtje janë dërgu për këtë plan në fund të vitit të kaluar, cilat prej atyre vërejtjeve janë marrë parasysh në draftin që do të diskutohet të hënën? Cili është qëndrimi i kryeministri për marrëveshjet paraprake e në veçanit për Asociacionin? A është kryeministri kundër kësaj marrëveshje siç e ka kundërshtu me akte të dhunshme dhe jodemokratike apo është pro, siç edhe i ka vendosur disa kushte?”, ka pyetur Hoti.
“A është i gatshëm kryeministri për njohje reciproke apo është i gatshëm t’i përbijë sharjet dhe kritikat ndaj oponentëve politikë, apo është i gatshëm ta pranojë marrëveshjen pa njohje duke e lënë problemin të hapur për qeverinë e ardhshme?”, ka vazhduar deputeti me pyetjet e tij.
