Deputeti i Lidhjes Demokratike të Kosovës, Avdullah Hoti, tha se buxheti i vitit 2024, është në shpërputhje me zotimet e Qeverisë Kurti.
Gjatë seancës plenare në Kuvend, Hoti vlerësoi që 85 mijë zyrtarëve publikë do t’u ulen pagat, në qoftë se ky buxhet vazhdon edhe në vitin e ardhshëm, përcjell teve1.info.
“Ky buxhet ka shpërputhje me zotimet që ka vetë Qeveria, ka shpërputhje me prioritetet ekonomike dhe me nevojat emergjente që kanë qytetarët. Janë tri elemente që duhet me kujdes t’i shohim gjatë dy leximeve, pagat dhe skemat sociale. Gjatë këtij mandati qeverisës 2021-2024, në total, kjo mazhorancë ka menaxhuar me buxhetin e vitit 2024, 11,4 miliardë euro. Është përkeqësuar struktura e buxhetit. Vetëm për subvencionim të energjisë në veri, janë shpenzuar 113 milionë euro. Duhet ta analizojmë këtë buxhet në kontekst të zotimeve të kësaj qeverie. Nëse në vitin 2024 ky buxhet shkon përpara kështu siç është, paga reale e 85 mijë zyrtarëve publikë, do të ulet në terma real”, deklaroi Hoti në kuadër të diskutimit mbi ndarjet buxhetore për Buxhetin e Kosovës për vitin 2024.
Kujtojmë se nga buxheti i Kosovës, qeveria ka ndarë 3 milionë euro edhe për shqiptarët e Luginës së Preshevës, Bujanocit e Medvegjës.
