Deputeti i Lidhjes Demokratike të Kosovës, Avdullah Hoti, akuzon Qeverinë e Kosovës për shpenzim të buxhetit, që sipas tij po ndodh përmes subvencionimeve.
Hoti, thotë se Qeveria ka dështuar në çdo fushë.
“Pas dështimeve në çdo fushë, ia kanë mësyrë shpenzimit të buxhetit përmes subvencioneve. Subvencionim i pajisjeve shtëpiake! Subvencionim i energjisë elektrike! Subvencionim i librave për nxënës!”, ka shkruar Hoti në Facebook.
Deputeti opozitar thotë se përfaqësuesit e Qeverisë nuk mund të quhen më as praktikantë, pasi që sipas tij praktika zgjatë gjashtë muaj, jo një vit.
“Mos u çuditni kur të subvencionohen policët për uniformë dhe këpucë, apo pacientët për barnat nga lista esenciale, pasi po dështojnë tenderët në vazhdimësi për arsyet që vetëm ata i dinë. Kjo lloj politike buxhetore shpërfaq varfërinë në dije të këtyre që po qeverisin. As praktikantë nuk mund tu thuash më, sepse praktika zgjatë gjashtë muaj deri në një vit. Pas tri vitesh në qeverisje, është e qartë se ide nuk kanë për politika fiskale e buxhetore në kushtet e ekonomisë së tregut dhe konkurrencës vendore e të jashtme. Ide nuk kanë si tërhiqen investimet, si prioritizohen investimet publike, apo si sigurohet vlera maksimale për paranë e shpenzuar nga buxheti”, ka shkruar ai tutje.
Sipas Hotit, krejt ajo çfarë dinë Qeveria është subvencionimi përmes platformës e-Kosova.
“Krejt çfarë dinë është subvencionimi përmes platformës ‘eKosova’, duke i kushtuar shtetit shumë më shtrenjtë”./teve1.info/
