Avokati, Taulant Hoda vlerëson se me miratimin e Deklaratës për të Zhdukurit, Serbia nuk ka marrë ndonjë përgjegjësi për zbardhjen e fatit të të pagjeturve.
“Përgjegjësia nuk mirret me këtë deklaratë, por përgjegjësia nuk do të mirret thuajse asnjëherë. Ajo duhet të ndiqet nga organet e drejtësisë në Kosovë pikë së pari dhe nga mekanizmat tjerë ndërkombëtarë, p.sh në raport me Serbinë e kemi Gjykatën Speciale që po i ndjek kryesit e pretenduar të veprave penale për krimet e luftës. Pra duhet të jenë mekanizmat tjerë që e gjejnë përgjegjësinë e individëve sepse përgjegjësia shtetërore është më e vështirë”, ka thënë Hoda në Këndin e Debatit në Tëvë 1.
Sipas tij, llogari për përgjegjësinë shtetërore të Serbisë sa i përket të të pagjeturve mund të kërkohet vetëm në Gjykatën Ndërkombëtare të Drejtësisë.
“Përgjegjësia shtetërore bëhet vetëm në Gjykatën Ndërkombëtare të Drejtësisë dhe aty nuk i mohohet as Kosovës dhe askujt tjetër që në të ardhmen të ngre padi në GjND nëse do ta gjejë përgjegjësinë kolektive shtetërore të Serbisë në këtë rast. Ndërsa përgjegjësinë individuale e ndjekin mekanizmat shtetërorë si policia, prokuroria apo gjykatata”, ka deklaruar Hoda.
Sipas Hodës kjo deklaratë as nuk e ndalon por as nuk i ndihmon më shumë mekanizmave që janë tani në fuqi apo që do të jenë në të ardhmen. /teve1.info/