Vendimi i Qeverisë së Kosovës për reciprocitetin me Serbinë, në çështjen e targave dhe dokumenteve të udhëtimit nxiti reagimin e Beogradit, e që u reflektua edhe në tensionim të situatës në komunat veriore të vendit.
Në mesin e këtyre tensioneve, pikëpyetja më e madhe ishte, nëse është koordinuar ose jo qeveria me ndërkombëtarët për masën e reciprocitetit?
Të martën kur edhe zyrtarisht kishim hyrë në afatin 30 ditësh të shtyrjes së reciprocitetit, ambasadori amerikan në Kosovë, Jeff Hovenier, tha se vendimet e Qeverisë ishin në koordinim të plotë me komunitetin ndërkombëtarë.
Reciprociteti me Serbinë, është çështje e cila në vazhdimësi ka ngjallur reagime e tensione, që nga shpallja e pavarësisë së Kosovës e këndej.
Kjo masë për herë të parë ishte marrë në vitin 2011, pasi Serbia nuk i njihte vulat e Republikës së Kosovës dhe këtij problemi autoritet në atë kohë iu përgjigjën po ashtu me mos njohje të vulave, apo reciprocitet.
Ky vendim ishte marrë nga ministrja e Tregtisë dhe Industrisë në atë kohë, Mimoza Kusari Lila.
Sot, pas 11 viteve, Kusari – Lila, kujton për tëvë1 rrethanat në të cilat ishte marr vendimi për reciprocitetin.
“Asokohe isha ministre e Tregtisë dhe Industrisë dhe masa e reciprocitetit kishte të bënte me funksionimin apo veprimtarinë ekonomike. Ka qenë dialogu në Bruksel duke u zhvilluar nga asokohe kryenegociatoria Edita Tahiri, e cila diskutonte për pranimin e vulave të Doganave të Kosovës që nuk pranoheshin që nga shpallja e Pavarësisë, gjegjësisht prej vitit 2008 – 2011. Ka pasur përpjekje të vazhdueshme dhe zonja Tahiri ende ishte në Bruksel kur më informoi që nuk ka asnjë dakordim edhe asnjë lëvizje nga pala serbe për të pranuar vulat e Doganave të Kosovës….në atë kohë ka qenë zgjidhja e vetme vendosja e masave të reciprocitetit”, tha Kusari – Lila.
Në vitin 2016, Kosova merr edhe një vendim tjetër për reciprocitet me Serbinë. Kësaj radhe kishte të bënte për transportin e naftës dhe të gazit. Kjo pasi pala serbe nuk pranonte certifikatat që Kosova lëshonte për shoferët dhe automjetet që bartin materie të rrezikshme. Po këtë vit, u vendos edhe reciprociteti për çështjen e teksteve shkollore, pasi Serbia pati pamundësuar dërgimin e një kamioni me libra për shqiptarët e Luginës.
Më pastaj më 1 shtator të vitit 2021 Qeveria e Kosovës mori vendim për reciprocitet në çështjen e targave me Serbinë. Edhe ky vendim pati nxitur tensione në veri. Më pastaj palët u dakorduan në Bruksel për të vazhduar me letrat ngjitëse në targa.
Konkluzionet e marrëveshjeve që kanë të bëjnë me targat dhe lirinë e lëvizjes përmes pikave kufitare mes Kosovës dhe Serbisë, datojnë që nga viti 2011, mirëpo pala serbe asnjëherë nuk ka shprehur gatishmëri për zbatimin e tyre.
Raporti i gazetarit Valmir Gallopeni.
