Shtypja e një butoni, e kthen prapa plot 26 vite.
Në ekran, shfaqet dëshmia e një prej krimeve më të rënda të luftës në Kosovë.
Është ky Behar Topilla, i mbijetuari i vetëm i Masakrës së Shavarinës në Çikatovë të Vjetër të Drenasit.
Këtë intervistë, Topilla e kishte dhënë, vetëm 4 ditë pasi i shpëtoi më të keqes.
E xhiruesi i saj, ishte fotoreporteri i Radios “Kosova e Lirë”, Gazmend Elshani.
Ky i fundit, me 5 maj, vizitoi edhe një herë spitalin e improvizuar në fshatin Tërdec.
Aty për herë të parë, thotë se e takoi Behar Topillën.
“Unë vazhdimisht i vizitoja vendet e tilla, spitalet e improvizuara të luftës dhe ditën në fjalë e takova beharin i cili ishte në gjendje të rëndë, të tmerrshme, më bëri përshtypje gjendja e tij e qetë dhe dëshira e tij për ta treguar të vërtetën siç kishte ndodhur. Për mua ishte e vështirë sepse emrat që i përmendte Behari, që i kishte lënë të plagosur ose vrarë ishin emra djemsh, moshatarë të mi, të qytetit të Drenasit që unë kisha bashkëjetuar me ta dhe dhimbja ishte e madhe”, tha Elshani për Tëvë1.
Elshani tregon për gjendjen të cilën e kishte gjetur të mbijetuarin e vetëm të një krimi çnjerëzor serb.
“Behari ishte i lodhur, i dërrmuar, i plagosur, i therrur me bajonetë në shumë pjesë të trupit, i dëmtuar e i plagosur nga shpërthimet e bombave që serbët i kishin hedhur mbi njerëzit që i kishin pushkatuar”, u shpreh ai.
Ishte kjo hera e parë që Behar Topilla, i tregoi botës se çfarë bën serbët tek Shavarinat me 1 maj 1999.
“Qëllimi i xhirimit dhe shpjegimi pse duhet më realizua këtë intervistë, ka qenë që duhet me dhënë kontribut që me sensibilizua opinioni e brendshëm, po sidomos opinionin e jashtëm për krimet, gjenocidin dhe terrorin që po e bën policia dhe ushtria serbe ndaj popullatës civile”, tregon Elshani.
Elshani thotë se kasetën me dëshminë e Behar Topillës, nuk arriti ta dorëzonte në Shtabin e Përgjithshëm të UÇK-së.
Por, për ruajtjen e saj u angazhua e tërë familja.
“Bartja dhe ruajtja e kasetave ka qenë një sfidë jo vetëm e imja, por edhe e miqve të mi, motrave, vëllezërve, që t’i ruajmë me të vetmin qëllim që ajo që ka ndodhur të mos humbet. Xhirmin për Beharin nuk kam arritur me dorëzua askund, e kam bartur me vete gjatë gjithë kohës deri pas çlirimit, ku në vitin 2000 është transmetuar për të herë të parë në një dokumentar “Pas 2 mijë vitesh rrugëtim” nga regjisori Esat Brajshori me producent, Nusret Pllana”, tha ai.
I mbijetuari i vetëm i masakrës së Shavarinës, ndërroi jetë me 25 nëntor në Suedi.
Ndërsa varrimi i tij u bë 30 nëntor në Gllanasellë të Drenasit.
