Është nënshkruar marrëveshja për lirim nga vizat për pasaportat diplomatike dhe ato zyrtare mes Republikës së Kosovës dhe Arabisë Saudite, shkruan teve1.info.
Kështu është bërë e ditur përmes një komunikate nga Ministria e Punëve të Jashtme dhe Diasporës, ku ndër tjerash thuhet se sot në Riad, zv.ministri i Punëve të Jashtme dhe Diasporës, Kreshnik Ahmeti, u prit nga homologu i tij arab, Waleed Abdulkarim El Khereiji.
Bëhet e ditur se gjatë takimit, u bisedua për ngritjen e bashkëpunimit ekonomik, bashkëpunimin në fushën e mbrojtjes dhe kundër terrorizmit dhe për nisjen dhe finalizimin e marrëveshjeve në fushën e transportit, edukimit dhe sportit.
“Duke vlerësuar lartë bashkëpunimin në mes të dy shteteve, zëvendësministri Ahmeti ka falënderuar Arabinë Saudite për përkrahjen dhe kontributin e vazhdueshëm për Republikën e Kosovës. z Ahmeti kërkoi që qytetarët e Republikës së Kosovës të kenë procedura më të lehta për hyrje në Arabinë Saudite”, thuhet në komunikatë.
Takimi u përmbyll me nënshkrimin e marrëveshjes për heqjen reciproke të vizave për bartësit e pasaportave diplomatike dhe pasaportave zyrtare./teve1.info./
