Në një intervistë në gjuhën serbe për Zërin e Amerikës, Hill nuk tregoi qartë se a do të kishte pasoja nëse Beogradi do të qëndronte në pozicionin aktual, teksa thotë se Serbia duhet të rimendojë nëse beson që Rusia do ta ndihmojë në zgjidhjen e problemeve me Kosovën.
Ai deklaroi se Serbia duhet të veprojë si anëtare e BE-së dhe duhet t’u bashkohet sanksioneve.
“Është e qartë se kjo është politika jonë dhe nga ana tjetër Serbia duhet të mendojë për të”, tha ai.
Tutje, ambasadori theksoi se SHBA-ja dhe Serbia kanë dallime të qarta jo vetëm për sanksionet por edhe “se sa shpejt Serbia dhe Kosova mund të përparojnë në dialog”.
Ndërkaq, lidhur me datën e vazhdimit të dialogut Kosovë – Serbi, ambasadori u shpreh se dy palët do të vendosin lidhur me këtë.
“E di që BE-ja po përpiqet shumë të vendosë në tryezë ide të ndryshme, tema që po diskutohen, për ta ruajtur vrullin. Nuk është shumë argëtuese të jesh ndërmjetës, këtë e kam bërë në të kaluarën. Negociatat janë shumë të vështira dhe e di që BE-ja po bën më të mirën që mundet dhe Serbia dhe Kosova duhet ta respektojnë këtë. Këto çështje nuk janë të lehta, nëse do të kishin, do të ishin zgjidhur shumë kohë më parë. Duhet t’o kuptojmë vështirësitë, por jo të jemi peng i tyre, por të shohim se ku do të donim të shkonim.”, tha ai, duke shtuar në fund se, megjithatë, “diplomatët amerikanë nuk duhet t’u tregojnë serbëve se çfarë të bëjnë”.
