Platforma analitike Hibrid.info ka publikuar një raport të detajuar pas analizës së një fotografie të bërë virale nga operacioni i fundit në liqenin e Ujmanit, e cila ishte shoqëruar me akuza për manipulim të mundshëm vizual nga ana e Lëvizjes Vetëvendosje.
Në pretendimet publike u sugjerua se fotografia ishte modifikuar për të hequr automjetet e KFOR-it, me qëllim që operacioni të paraqitej si i realizuar ekskluzivisht nga Forca e Sigurisë së Kosovës.
Megjithatë, pas analizës vizuale dhe digjitale të kryer nga hibrid.info, nuk janë gjetur prova që dëshmojnë ndonjë ndërhyrje apo manipulim në imazh.
Sipas ekspertëve të platformës, janë përdorur teknika të avancuara të inspektimit të metadata-ve dhe krahasimit të shtresave të figurës, duke përjashtuar mundësinë e redaktimit të qëllimshëm. “Të gjitha elementet vizuale rezultojnë të jenë në përputhje me ndriçimin natyror, hijet, strukturën e pixelëve dhe formatin origjinal të imazhit”, thuhet në raport.
Hibrid.info nënvizon se analiza është kryer në mënyrë të pavarur, pa ndikime politike apo institucionale, me qëllim garantimin e transparencës dhe informimit të saktë të publikut.
Analizën e plotë mund të gjeni në linkun më poshtë:
https://hibrid.info/fotografia-e-operacionit-te-fsk-se-nuk-eshte-e-manipuluar/
