Arben Ymeri e kishte kanosur hetuesen e Anti-terrorizmit në Policinë e Kosovës, A.B., në vitin 2016.
Kërcënimi kishte ardhur për shkak të një rasti që hetuesja po e hetonte në atë kohë, për vepra terroriste.
E përfshirë në pistën hetimore ishte një e afërme e të akuzuarit Ymeri.
Nëntë vite pas ata po ballafaqohen në Gjykatë, ku të enjten ajo dha dëshminë e saj.
“Në momentin kritik, unë e kam pasur burrin edhe djalin prezent dhe jam përgatit me bë një veprim dhe ia kam kthyer tash e shohim: kush kënd e ka me vra shkurt… Në të njëjtën kohë kam kaluar te dollapi i armës edhe e kam marrë armën dhe kam dalë me pa se çka po ndodhë me ditë se skisha ide se çka po ndodhë… Kam tentu me dalë në të njëjtën kohë me telefonatë tha dil për 5 minuta jam te Grandi, kur mka thënë jam të Grandi jam ndalu se e dita që e ka keqkuptu adresën time”, ka deklaruar ai.
Ajo shton se pas kësaj telefonate, vazhdimisht është ndjerë e frikësuar dhe e kërcënuar.
“Me urdhër të drejtorit, pas kësaj bisede me urdhër të drejtorit të Anti-Terrorit unë jam udhëzuar urgjent me shku në stacionin më të afërt me raportu rastin… Dhe me siguru fëmijën e mi, familjen time… Personi (i akuzuari) ka qenë subjekt i hetimeve të veprave më të rënda në Drejtorinë Kundër Terrorizmit… Edhe nuk ndihna e sigurt për veten dhe familjen time…”
Ballafaqim pati edhe mes të dëmtuarës e të akuzuarit.
“Sikur të isha terrorist pse më lëshuan për një muaj e tri ditë dhe vetëm për armëmbajtje ku po bazohen?”, ka deklaruar Ymeri.
“Absolut që ekzistojnë dosjet faktet dhe ajo pjesa e Gjykatës unë nuk kam kompetencë me fol pse”, tha dëshmitarja.
Pyetje për hetuesen pati edhe mbrojtësi i të akuzuarit.
Avokati: A keni biseduar me bashkëshorten e të akuzuarit në telefon?
“Edhe punoj me ligjet e Kosovës dhe Ligjin e Policisë së Kosovës… Në rastin konkret unë i kam zbatuar masat e fshehta të përgjimeve kështu që nuk mund të jap informacion për një vepër që dënohet me ligj… Kam zhvilluar masa të fshehta të hetimit dhe përgjimit dhe nuk mund të përgjigjem në këtë pyetje”, tha ajo.
Prokurori i çështjes kërkoi që në seancën e radhës të ftohen edhe disa eprorë të dëmtuarës në këtë rast për të dhënë dëshmi.
Sipas aktakuzës, i dyshuari ka kryer këtë vepër pasi ka telefonuar me qëllim të frikësimit hetuesen policore për detyrën e saj zyrtare.
Ndërkaq, në dëshminë e saj zyrtarja policore ka deklaruar se Ymeri ka qenë edhe pjesë e organizatës terroriste ISIS, recidivist i shumë veprave penale si dhe i dyshuar për një sulm terrorist në Manastirin e Deçanit.
