Një hetim ndërkombëtar për sulmin terrorist në Banjskë të Zveçanit po mirëpritet nga njohës të fushës. Kjo konsiderohet se do ta forcon pozitën e Kosovës në tryezën e diskutimeve me Serbinë, teksa kërkohet të bojkotohet një i tillë derisa të përfundon raporti ndërkombëtar mbi këtë sulm.
Janë bërë afro dy javë që nga sulmi terrorist në Banjskë të Zveçanit ku mbeti i vrarë rreshteri policor, Afrim Bunjaku.
E pas kësaj ngjarjeje, kryeministri Albin Kurti por edhe partitë opozitare, po kërkojnë një hetim ndërkombëtar për të zbardhur gjithë rastin.
Këtë po e sheh si të domosdoshme, profesori i së drejtës penale ndërkombëtare, Ismet Salihu.
Ai thotë se një gjë e tillë do duhej bërë në koordinim të organeve vendore dhe ato ndërkombëtare.
Sipas tij, në rast se argumentohet se shteti serb ka qenë i implikuar në këtë sulm, pozicioni i Kosovës do të përforcohet në tryezën e diskutimeve në Bruksel.
Edhe ish zv.ministri i Punëve të Brendshme, Selam Shkodra thotë se duhet bërë një hetim ndërkombëtar në mënyrë që të nxirret një rezultat kredibil për shkak se rasti është kompleks.
Madje, ai vlerëson se derisa të përfundojë hartimi i një raporti të tillë, institucionet kosovare duhet ta bojkotojnë dialogun me Serbinë.
Ndërkaq, në kodin e procedurës penale, thuhet se çdo kush që cenon sovranitetin e Republikës së Kosovës, dënohet jo më pak se dhjet vjet burgim.