Nënkryetarja e PDK-së, Vlora Çitaku ka thënë se në takim me kryeministrin, Albin Kurti është biseduar vetëm për datën e zgjedhjeve.
Ajo në një intervistë për emisionin “Info Nata” ka thënë se partia e saj është në garë për t’i fituar zgjedhjet, derisa shtoi se nuk do të këtë koalicion PDK-LVV.
Kjo pasi sipas saj, hendeku që ekziston në mes këtyre dy partive është dy dekadash dhe i thellë.
“Ne kemi shkuar në takim dhe aty është folur vetëm për një çështje, për datën e zgjedhjeve. Nuk është diskutuar për asnjë lloje koalicioni, këtë ua them me kompetencë të plotë…ne jemi në garë për t’i fituar zgjedhjet dhe një politikani të papërgjegjshëm të paparashikueshëm dhe aventurier çfarë është kryeministri Kurti i kemi venë përballë një kandidatë serioz, të përgjegjshëm, i parashikueshëm, i cili do të vijë me ofertë konkrete…pastaj kandidati ynë do të përcaktojë aleancat, bazuar në afërsinë programore jo personale, e ajo çfarë është e qartë dallimi ideologjik dhe hendeku që ekziston në mes PDK-së dhe LVV-së, pra është dy dekadash dhe shumë i thellë”, ka thënë ajo.
