Hendbollistet e Kombëtares së Kosovës janë grumbulluar në Luksemburg gjatë ditës së sotme, ku do të përgatiten për turneun e fazës së parë kualifikuese për Botërorin 2025.
FHK-ja, ka njoftuar se ky grumbullim është vendosur të mbahet në Luksemburg për shkak të afërsisë me vendet ku luajnë lojtaret kosovare dhe me vendin ku do të zhvillohet turneu.
Kosova do të qëndroj deri të enjten në Luksemburg, përpara se ta marrë rrugën drejt Belgjikës, ku në qytetin Hasselt do të luhen ndeshjet e Grupit 2.
Të premten prej orës 20:00, Kosova do të përballet me Belgjikën kurse të shtunën do të luaj kundër Bosnjë e Hercegovinës nga ora 18:00.
Synimi i Kombëtares së Kosovës është shumë i qartë, t’i fitojë të dyja ndeshjet për të siguruar kualifikimin në fazën tjetër të Kupës së Botës 2025.
Optimizmi është i madh tek hendbollistet, të cilat kanë treguar formë të mirë këtë sezon në klubet e tyre.