Hendbollistët e rinj të Kosovës kishin fazë të suksesshme përgatitore për Kampionatin Botëror që mbahet në Egjipt.
Kosova U19 i fitoi të tri miqësoret e zhvilluara në Slloveni ndaj Kuvajtit dhe tani pret të ketë sukses edhe Botërorin që nis të mërkurën dhe përfundon më 17 gusht.
Kosova të mërkurën do ta zhvillojë ndeshjen e pare, të dytën e ka të premten kurse duelin e tretë e zhvillon të shtunën.
Kosova U19 përballet me Zvicrën të mërkurën nga ora 18:30 në ndeshjen që i takon Grupit B dhe luhet në sallën “Dr Hassan Moustafa” në Giza.
Në grup me Kosovën e Zvicrën janë edhe Maroku dhe Hungaria, ndeshje që i luan të premten dhe të shtunën.
Kjo është gjenerata e tretë e Kosovës që ka siguruar paraqitjen në kampionat botëror, si në asnjë sport tjetër ekipor.
Kosova U19 paraqitjen në Botëror e siguroi nëpërmjet “IHF Trophy”, rrugës së dytë dhe më e shkurtër, që është ngjarje e Federatës Ndërkombëtare të Hendbollit, që për synim ka zhvillimin e hendbollit nëpër botë.
Në Botërorin në Egjipt, 17 përfaqësuese do të jenë nga Evropa, pesë nga Afrika, pesë përfaqësuese janë nga Azia, tri nga Konfederata Jugore dhe Qendrore e Amerikës dhe një nga Konfederata e Hendbollit të Amerikës së Veriut dhe Karaibeve.
