Të premten në Federatën e Hendbollit të Kosovës është mbajtur konferencë për shtyp lidhur me Final 4 të Kupës së Kosovës në hendboll.
Në konferencë folën presidenti i Federatës së Hendbollit të Kosovës, Edin Kolgeci, dhe kryetari i KH Kastriotit, Fisnik Jashari.
Kolgeci ka treguar se çdo gjë është gati për turneun final të Kupës, që të shtunën e të dielën, mbahet në palestrën “Bill Clinton” në Ferizaj. Duke u dëshiruar tetë skuadrave pjesëmarrëse sukses, Kolgeci është shprehur i bindur se Final 4 i Kupës do të jetë spektakël hendbolli.
Jashari, si udhëheqës i njërit prej klubeve nikoqire, ka treguar për punët që kanë përfunduar deri më tani. Ai ka treguar se në kuadër të turneut final do të ketë edhe program artistik, ndërsa u ka bërë thirrje gjithë adhuruesve të hendbollit që të shtunën e të dielën të jenë në palestrën në Ferizaj.
