Nënkryetari i Lidhjes Demokratike të Kosovës, Lutfi Haziri, tha se gjatë takimit në Bruksel me Emisarin e Posaçëm të Bashkimit Evropian për dialogun Kosovë-Serbi, Miroslav Lajçak, i ka adresuar disa nga shqetësimet e partisë së tij në këtë fazë të zhvillimit.
Në kuadër të diskutimit për draft-statutin e Asociacionit, Haziri tha se dokumenti i fundit i propozuar, është vetëm ai evropian.
“Unë e kam takuar Lajçakun para 1 jave në Bruksel. Në mesin e takimeve, jam takuar edhe me të, ku kemi biseduar për disa nga shqetësimet që LDK-ja i ka në këtë fazë të zhvillimit. Draft-statuti i fundit në tavolinë, quhet draft-statuti evropian, tjerat janë dokumente inegzistente. Ato dokumente nuk ekzistojnë, nuk trajtohen”, deklaroi Haziri në emisionin “Këndi i Debatit”.
Po ashtu, nënkryetari i LDK-së, tregoi se zyra e Lajçak, tashmë ka ndërtuar një draft të ri, i cili është i bazuar në 16 modele ekzistuese brenda Evropës.
“Zyra e Lajçak e ka ndërtuar një draft të ri, i cili është bazuar në 16 modelet ekzistuese brenda Evropës. Në dy konventa, akomodimi i pakicave sipas përvojave në Evropë, në përputhje me konventën për pakica nacionale dhe e dyta për vetë qeverisje lokale. Marrëveshja e 28 shkurtit në Bruksel, që tani njihet Kurti-Vuçiq, i referohet më shumë konventës për pakica nacionale”, shtoi tutje Haziri në Tëvë1.
