Nënkryetari i LDK-së, Lutfi Haziri, ka dhënë detaje në lidhje me vizitën e të dërguarit të Bashkimit Evropian për dialogun ndërmjet Kosovës dhe Serbisë, Miroslav Lajçak.
Në një intervistë për Euronews Albania, ai tha se diplomati kërkon që të ketë një konsensus më të gjerë në lidhje me diskutimet për dialogun Kosovë – Serbi, transmeton teve1.info.
“Ardhja e tij në Prishtinë ishte në kuadër të takimit të ardhshëm të bisedimeve. Lajçak është shumë i kujdesshëm. Në raport me opozitën ka ndarë një pjesë të madhe të procesit”, tha deputeti.
Haziri tha tutje se Lajçak kërkon që të ketë një konsensus sa më të gjerë.
“Tani ai kërkon që të ketë një konsensus sa më të gjerë. Procesin e normalizimit apo raportet me Serbinë, nuk mund ta bëjë një parti apo një individ. Në kampin opozitar ka dezertuar Haradinaj dhe partia e tij. LDK-ja beson se ka hapësirë që të përmirësohet pjesa që ne e shohim problematike. Ndryshimi i Kushtetutës në Kosovë do të jetë hapja e kutisë së Pandorës në këto rrethana në raport me organizimin e brendshëm”, theksoi ai.
