Haziri ka thënë se autostrada e Gjilanit ka stagnuar për shkak të mospërfundimit të angazhimeve konkrete të Qeverisë dhe sipas tij mosinteresimit të komunës, që udhëhiqet nga Alban Hyseni i LVV-së, raporton Teve1.info
“Autostrada e Gjilanit ka mbetur në stagnim për shkak të mos përfundimit të angazhimeve konkrete të qeverisë, mosinteresimit total të komunës dhe të ekzekutivit të saj për t’i dhënë shtytje dhe buxhetim përfundimit të fazës së parë të punimeve prej Lipjanit në drejtim të Bresalcit dhe mos shpallja dhe mosnjoftimi pa asnjë lloj kalendari prej Gllamës në drejtim të Konçuli që është faza e dytë. Dhe me këtë projekt zhvillimor jo vetëm që lidhet Kosova lindore dhe Anamorava me qendër por ndërtohet edhe qarkorja e Gjilanit, të cilin projekt ne e kemi realizuar në koordinim me qeverinë e kaluar por që tani nuk ka asnjë lloj tendence që mund të na sigurojë se do të zhvillohet tutje”, tha ai.
Sipas tij, në këtë vit ka munguar vullneti politik për ta buxhetuar këtë projekt dhe se kërkesa e tij është që të vazhdojë e të shpallet faza e dytë e autostradës.
“Këtë vit ka mungu vullneti politik për ta buxhetu këtë projekt madhor dhe kërkesa jonë është që të vazhdojë dhe të shpallet faza e dytë e autostradës. Ajo çka neve na brengos në këto projekte është mosinteresimi total dhe anashkalimi i komunës tonë”, tha më tej Haziri.
Ish-kryetari i LDK-së në komunën e Gjilanit ka përmendur edhe projektin e dytë për investimet ndërkombëtare që kanë të bëjnë me hyrje-daljet e Gjilanit, që sipas tij kanë mbetur aty ku i ka lënë qeverisja e Lidhjes Demokratike të Kosovës.
“Projekti i dytë madhor që ka të bëjë me investimet ndërkombëtare, hyrje daljet e gjilanit, hyrja për Prishtinë, hyrja për Kllokot, dhe hyrja apo dalja për drejtim të Bujanocit dhe Kamenicës kanë mbetur aty ku i ka lënë qeverisje e LDK-së punimet. Nuk është zhvilluar asnjë aktivitet i punës. Jemi në fund të muajit maj dhe asnjë aktivitet kalendar nuk është shënuar në librin e punës”, tha Haziri. /teve1.info/
