Violeta Haxholli nga Demokracia për veprim ka thënë se 50 vëzhgues të tyre janë duke i monitoruar në terën tubimet politike të partive për zgjedhjet e 9 shkurtit.
Ajo tha deri më tani janë mbajtur mbi 160 aktivitete dhe nga to ka prirë LDK-ja me 51 të tilla.
“Ne i kemi 50 vëzhgues në terën të cilët po i vëzhgojnë nga afër tubimet e partive politike. Subjekte politike kanë mbajtur 160 aktivitete, ato pra që i kemi monitoruar ne. Ka prirë LDK-ja me 51 aktivitete pasuar nga PDK. LVV, AAK … Kryesisht këto aktivitete kanë qenë me rreth 200 pjesëmarrës, ndërsa 15 % e aktiviteteve kanë qenë tubime me mbi 500 pjesëmarrës“, ka thënë ajo.
Tutje, ajo tha se gjuha e urrejtjes është duke vazhduar të përdorët nga partitë politike dhe vetëm gjatë javës së kaluar janë hasur 25 raste të tilla.
“Fatkeqësisht trendi i gjuhës së nxitjes dhe urrejtjes po e shohim edhe në këtë fushatë zgjedhore. Në javën që lamë pas kemi hasur diku në 25 raste për përdorim të gjuhës nxitëse dhe urrejtjes. Kjo kryesisht ka qenë në tubimet e partisë në pushtet, por e kemi hasur edhe në tubimet e partive opozitare. Partitë të ndërprenë një praktike të tillë sepse kjo i kontribuon negativisht atmosferës së fushatës dhe ditës së zgjedhjeve, pastaj mund të bartët edhe si fenomen edhe të përkrahësit e partive dhe të shkaktojë përplasje të panevojshme në terën ”, ka deklaruar ajo në emisionin “Ditari” në Tëvë1.
Ndryshe, mbi 120 mijë euro gjobë janë shqiptuar për 10 ditë të fushatës zgjedhore ndaj partive politike për shkak të thyerjes së rregullave të fushatës. Lidhja Demokratike prin e para me shumën e dënimit të marrë, pasur nga PDK, AAK dhe Vetëvendosje.
Partitë politike kanë afat që brenda 15 ditësh të paguajnë gjobat e shqiptuara nga Paneli Zgjedhor për ankesa dhe parashtresa.
