Ministrja e Drejtësisë, Albulena Haxhiu, ka thënë se vrasësit e të riut, Lulzim Fejzullahu, duhet ta marrin dënimin e merituar.
Ajo ka thënë se lajmi për vdekjen e tij e sidomos në mënyrë të dhunshme është tmerrues.
“Për vrasjen e Lulzimit drejtësia duhet të veprojë dhe dorasët duhet të marrin dënimet e meritore”, ka shkruar ajo në Facebook.
Haxhiu ka kritikuar edhe publikimin e pamjeve në media, ku shihen dy personat teksa e rrahin tashmë të ndjerin Fejzullahu.
“Sikur ky lajm të mos mjaftonte, disa media publikuan edhe pamjet brutale të këtij akti, pamje të cilat nuk mund të jenë të dobishme për askë veçse për Prokurorinë. Nga njëra anë mungesë e theksueshme e emisioneve edukative, emancipuese, dhe në anën tjetër me nxitim shpërndarje të pamjeve të dhunës e vrasjeve. Kjo nuk është në rregull dhe si e tillë nuk mund të pranohet”, ka shkruar ajo, përcjell teve1.info.
Prokuroria ka bërë të ditur se dy të dyshuarit për këtë rast, të moshës së mitur gjenden në paraburgim.
18-vjeçari nga Podujeva ka ndërruar jetë në spital të premten, pasi nuk u kishte mbijetuar palgëve të marra pas sulmit nga dy persona.
Familjarët e të ndjerit dyshojnë se i gjithë konflikti ka fillua brenda një salloni, ku viktima ka shkuar për të t’i hequr flokët.
