Ministrja e Drejtësisë, Albulena Haxhiu ka thënë se përdorimi etno-politik i aktit kriminal të vrasjes së një polici në Lloznicë nga ana e Qeverisë së Serbisë është i papranueshëm, i qëllimshëm dhe i parapërgatitur.
Haxhiu tha se nuk dihet ende se a është vrarë Faton Hajrizi, ku siç thotë ajo, nevojitet hetim i thellë për të zbardhur të vërtetën.
“Nëpërmjet ish zëdhënësit të partisë së Sllobodan Millosheviqit (SPS), tash kryetar i saj dhe ministër i punëve të brendshme të Serbisë, Ivica Daçiq, u dha lajmi se i arratisuri nga burgu në Kosovë, Faton Hajrizi, i dënuar për disa vepra të rënda kriminale, është vrarë.
Informacionet këto ditë ishin kundërthënëse, andaj nuk mund ta dimë me siguri, se a është ai njëmend i vrarë dhe nëse po, a është vrarë në territorin e Serbisë apo të Republikës Serbe në Bosnje dhe Hercegovinë, përfshirë detajet tjera të rëndësishme e të nevojshme për hetim. Domosdo nevojitet hetim i gjerë e i thellë, për të zbardhur të vërtetën e këtij rasti”, ka shkruar ajo.
Ajo ka kërkuar një hetim vendor dhe ndërkombëtar që të hetojë aktet sistematike të nxitjes, organizimit e bashkëorganizimit të arratisjeve së të burgosurve dhe të kërkuarve nga drejtësia në Kosovë, në territorin e Serbisë.
Derisa, Haxhiu shtoi se këto arratisje që po ndodhin në Kosovë, janë të organizuara me grupet kriminale të Serbisë.
“Një hetim vendor dhe ndërkombëtar është i domosdoshëm që të hetojë aktet sistematike të nxitjes e cytjes, organizimit e bashkëorganizimit të arratisjes së të burgosurve, paraburgosurve e të të kërkuarve nga drejtësia në Kosovë, në territorin e Serbisë, dhe krijimin atje të një ambienti mburojë ndaj pandëshkueshmërisë e ndjekjes penale të kriminelëve nga organet e Republikës së Kosovës. Si ministre e drejtësisë, ofroj bashkëpunimin e plotë të shtetit tonë në këtë drejtim”, ka deklaruar Haxhiu./teve1.info/
