Ministrja e Drejtësisë, Albulena Haxhiu bashkë me shefen e grupit parlamentar të LVV-së, Mimoza Kusari Lila po bashkëbisedojnë me nxënësit shkollës “Ahmet Gashi” për dhunën me bazë gjinore.
Haxhiu tha se sot në të gjitha shkollat në orën e parë të mësimit do të diskutohet për dhunën në familje.
“Ministria e Drejtësisë e ka përgjegjësinë që të adresojë politikat për adresimin e dhunës në familje dhe dhunës me bazë gjinore. Deri tani kemi ndërmarrë shumë veprime të cilat kanë për qëllim që të rehabilitojnë personat të cilët bëjnë veprime të tilla, pra kryejnë dhunë në familje apo janë të dhunshëm në ambientin familjar, sikurse kemi ndërmarrë shumë veprime që kanë për qëllim që viktimave t’iu ofrohen shërbime që u nevojiten”, tha Haxhiu.
Ajo tha se shteti ofron ndihmë juridike falas për viktimat e dhunës në familje, teksa po ashtu ka ndërmarrë hapa për dënime plotësuese për personat që shpallen fajtorë për dhunë në familje dhe dhunë seksuale.
Nën organizimin e Ministrisë së Drejtësisë ka nisur fushata globale “16 Ditët e Aktivizmit Kundër Dhunës me Bazë Gjinore”.
Për nder të kësaj ngjarje do të organizohen disa aktivitete.
E aktivitetet do të përmbyllen në orën 18:15, ku do të bëhet edhe shënimi i kësaj fushate. Aty do të jetë i pranishëm edhe kryeministri i Kosovë Albin Kurti.
