Ministrja e Drejtësisë, Albulena Haxhiu, sot ka marrë pjesë në lansimin e projektit “Rehabilitimi dhe Riintegrimi i të Miturve – Viktima të Dhunës Seksuale”, të Qendrës Kosovare për Rehabilitimin e të Mbijetuarve të Torturës (QKRMT).
Në fjalën e saj, ministrja Haxhiu tha se viktimat e dhunës seksuale, në veçanti kur viktima është fëmijë dhe e mitur, kanë nevojë për dorën e shtetit dhe punën e përbashkët me organizatat e shoqërisë civile, në mënyrë që ato t’i rikthehen jetës duke punuar për vete dhe familjet e tyre.
Ministrja Haxhiu, e vlerësoi shqetësuese rritjen e rasteve të dhunës seksuale në Kosovë, për çka tha se “ është një kambanë e fuqishme alarmi, për të gjitha institucionet tona, shoqërinë civile dhe mediat, që t’i bashkojmë të gjitha përpjekjet dhe njëzëri të luftojnë kundër stereotipive gjinore e praktikave të dëmshme që ndërlikojnë në menaxhimin efektiv të këtyre rasteve”, thuhet në komunikatën e ministrisë.
Për gjatë këtyre dy viteve, ministrja Haxhiu tregoi se Ministria e Drejtësisë ka iniciuar dhe zbatuar një seri reformash ligjore e financiare të cilat luftojnë ngacmimin e dhunën seksuale dhe fuqizojnë politikat e parandalimit duke përmendur kështu edhe hartimin e Protokollit Shtetëror për Trajtimin e Rasteve të Dhunës Seksuale.
Sipas ministres Haxhiu, përllogaritja e kostove financiare bazuar në nevojat e përditshme, do ta bëjë të zbatueshme këtë Protokoll, i cili do të sjellë me pas edhe menaxhim të rasteve të dhunës seksuale.
Ministrja Haxhiu, u zotuar se nuk do të rresht përpjekjet për të përparuar në zvogëlimin e dhunës me bazë gjinore, si në drejtim të përditësimit të kuadrit ligjor dhe harmonizimit të tij me instrumentet ndërkombëtarë, ashtu edhe në përmirësimin e monitorimit të zbatimit në praktikë të këtij kuadri ligjor, të politikave, e mjeteve të tilla siç është edhe Protokolli Shtetëror për Trajtimin e Rasteve të Dhunës Seksuale.
