Haxhiu këto deklarime i bëri gjatë pjesëmarrjes në fushatën e Institutit të Kosovës për Drejtësi në shënimin e 9 dhjetorit, Ditës Ndërkombëtare Kundër Korrupsionit.
“Është jashtëzakonisht e rëndësishme që të kemi aktivitete të tilla që kanë për qëllim që të emancipojnë shoqërinë për pasojat që krimi i organizuar dhe korrupsioni sikurse edhe ata që kanë përgjegjësi në Qeveri dhe në institucionet tjera. Siç jeni në dijeni, njëra ndër prioritetet tona është lufta kundër krimit të organizuar dhe korrupsionit dhe në këtë drejtim kemi marrë shumë veprime në fuqizim të paketës ligjore kundër korrupsionit. Së pari Projektligji për parandalimin e korrupsionit dhe Projektligji për Byronë e Konfiskimit të pasurisë së pajustifikueshme e që para pak ditësh e kemi pranuar edhe opinionin e Komisionit të Venecias”, tha Haxhiu, teksa shtoi se së bashku me kryeparlamentarin Konjufca do të udhëtojnë në Venecia për të marrë këtë raport.
Kurse, Eugen Cakolli nga IKD-ja, e vlerësoi punën e institucioneve në luftën kundër korrupsionit.
“Simbolika e këtij aktiviteti është ‘vaksinimi’ kudër korrupsionit dhe i formimi përmes llojeve dhe manifestimeve, për shkak se ka lloje të ndryshme të korrupsionit të cilat shpesh herë mund t’i hasim në përditshmëri. KDI vlerëson jashtëzakonisht shumë përpjekjet e Qeverisë për konsolidimin e kornizës ligjore për luftimin e korrupsionit në kuadër të secilës janë miratuar një gamë të gjerë ligjesh”, tha Cakolli.
Simbolikë e aktivitetit të IKD-së ishte vendosja “vaksinimi” kundër korrupsionit dhe shpërndarja e Abetares kundër korrupsionit.
