E ftuar në emisionin “Këndi i Debatit” me Dukagjin Maliqin në Tëvë 1, Haxhiu tha se versioni final do të votohet më 16 mars në Komisionin e Venecias, dhe sipas saj, pak ndryshon drafti i parë prej versionit final.
“Një prej prioriteteve më të rëndësishme të Ministrisë së Drejtësisë por edhe Qeverisë së Republikës së Kosovës është Vettingu në sistemin e Drejtësisë. Duke qenë prioritet ne kemi punuar prej ditës së parë në këtë drejtim. Tani më 4 mars, të premten, e presim draftin e parë të opinionit të Venecias, mirëpo, do të doja të shtoja prej përvojës që kemi me komisionin e Venecias, pak ndryshon drafti i parë prej versionit final, pra pak a shumë janë pikat e njëjta që adresohen edhe në versionin final, ndërsa versioni final do të votohet më 16 mars në Komisionin e Venecias”, tha Haxhiu.
Ajo shtoi se nuk do të donte që Kosova të jetë shtet që nuk i aplikon opinionet e Venecias.
“Ne e dimë që opinionet e Venecias nuk janë obligative por unë nuk do të doja që Kosova të jetë shtet që nuk i aplikon opinionet e Venecias, madje kemi një shembull konkret, Kroacisë, që në vazhdimësi kur ka draftuar projektligjet të tjera, dokumente, dmth ka adaptuar apo aplikuar opinionet e Venecias dhe besoj që kjo ka qenë e rendësishme dhe për rrugën në integrimin e saj evropian…besojmë, që jemi optimistë për këtë opinion, ndonëse nuk mund të flas me siguri për faktin se ne kemi pas edhe takime, sikurse ne kanë pas edhe shoqëria civile, edhe Presidenca, edhe kryetari i Kuvendit me sa e di ka dërguar letër Venecias për rëndësinë që ka procesi i Vettingut, por edhe zyra e BE-së me sa e di dhe përfaqësuesit e tjerë ndërkombëtar kanë pasur komunikime me ta”, tha Haxhiu.
Haxhiu theksoi se nuk e dijnë se cili është versioni final dhe janë “në ethet e së premtes”.
“Por Venecia atë ditë kur kemi pas takim me ta, kanë thënë se nuk është mirë që të kemi aq shumë amandamente, kanë përmend mjafton një të kemi si amamndamet kushtetues e tjerat të rregullohen me ligj. Por ne nuk mund ta dimë me siguri cili mund të jetë versioni final. Dmth jemi në ethet e së premtes”, tha Haxhiu. /Teve1.info/
