Ministrja e Drejtësisë, Albulena Haxhiu, ka kritikuar për vonesa Gjykatën Kushtetuese të Kosovës.
Përmes një postimi në Facebook, Haxhiu ka thënë se Kushtetuesja e ka vonuar më shumë se një muaj Ligjin për Byronë Shtetërore për Verifikimin dhe Konfiskimin e Pasurisë së Pajustifikueshme.
“Edhe sa ditë të tjera i duhen Gjykatës Kushtetuese? Kanë kaluar më shumë se një muaj nga njoftimi i Gjykatës Kushtetuese për Ligjin për Byronë Shtetërore për Verifikimin dhe Konfiskimin e Pasurisë së Pajustifikueshme por ende nuk është publikuar Aktgjykimi i plotë”, ka shkruar Haxhiu.
Sipas saj, vonesat e tilla vazhdojnë të jenë goditja e rradhës ndaj reformës dhe qytetarëve.
“Rrjedhimisht, po bëhen 518 ditë prej kur Gjykata e ka në trajtim këtë reformë të rëndësishme. Vonesat e tilla vazhdojnë të jenë goditja e radhës ndaj reformës dhe qytetarëve”, ka thënë Haxhiu.
Ndryshe, sot edhe Ministri i Financave, Hekuran Murati ka kritikuar Gjykatën Kushtetuese për mos publikimin e plotë të aktgjykimit për Ligjin për Pagën Minimale.
