Ministrja në detyrë e Drejtësisë, Albulena Haxhiu e ka quajtur të habitshëm vendimin e Gjykatës Supreme i cili konsideron nxjerrjen e akteve nënligjore nga ministrat që janë njëkohësisht deputetë, si të kundërligjshme dhe shkelje të dispozitave kushtetuese.
Haxhiu ka paralajmëruar se vendimin e Supremes shumë shpejt do ta ankimojnë në Gjykatën Kushtetuese, pasi sipas saj, ai përbën tejkalim të kompetencave dhe ndërhyrje në kompetenca të Kushtetueses.
“Për mua ka qenë një aktgjykim i habitshëm për faktin se kjo gjykatë së pari i ka tejkaluar kompetencat që ka. Ka hyrë në kompetenca të Gjykatës Kushtetuese. Ne do ta ankimojmë këtë vendim të Gjykatës Supreme sepse e kemi të drejtën e dërgimit të tij në Gjykatën Kushtetuese dhe pastaj do t’i mbetet asaj që ta bëjë vlerësimin për këtë. Do ta ankimojmë sa më shpejt, jemi duke punuar për këtë argumente kemi të mjaftueshme dhe besojmë që sa më shpejt përmes avokaturës shtetërore do të bëhet ankimimi i këtij vendimi”, ka deklaruar ajo para mediave, pas dështimit të 48-të të seancës konstituive të Kuvendit.
Ajo ka theksuar se, pavarësisht vendimit të Gjykatës Supreme, puna e qeverisë në detyrë nuk do të ndalet.
“Do të vazhdojmë të mbajmë mbledhje të Qeverisë sepse jemi qeveri në detyrë, shteti nuk mund të mbetet pa një qeveri që është të paktën tranzitore, pra që është në detyrë për t’i kryer obligimet që i ka e që i kanë mbetur derisa të zgjidhet qeveria”, ka shtuar Haxhiu./teve1.info/
