Ministrja e Drejtësisë, Albulena Haxhiu ka thënë se Lëvizja Vetëvendosje dëshiron ta korrigjon vendimin e gabuar të Kuvendit.
Haxhiu ka thënë se kanë vullnet për ta bërë një gjë të tillë por që sipas saj duhet të shihet se cila është mënyra më e përshtatshme.
“Ne jemi të gatshëm që ta ta korrigjojmë vendimin e gabuar të Kuvendit të Kosovës. Kemi vullnet që ai gabim të korrigjohet, por duhet të shohim se cila është mënyra më e përshtatshme. Një situatë e tillë nuk është e paraparë as në Rregulloren e Kuvendit, as në Kushtetutë apo në ndonjë ligj tjetër ” ka thënë ajo para gazetarëve pas dështimit të seancës konstituive të Kuvendit.
Ajo ka shtuar se deputetët e VV-së janë të gatshëm të kryejnë detyrat e tyre dhe të ofrojnë zgjidhje, duke lënë të hapur mundësinë që raportin ta hartojë ose komisioni ekzistues ose ndonjë komision i ri, “por mund të ketë edhe propozime të tjera”.
“Janë disa zgjidhje përpara unë e përmenda vetëm një por mund të ketë edhe propozime tjera për shembull mund sërish ose të krijohet themelohet një komision i ri për verifikim të mandateve ose komisioni që e ka kryer këtë punë fillimisht në seancën e 15 prillit ta bëj punën e njëjtë. Ne e kemi propozuar këtë por ata e braktisën takimin tonë”, ka shtuar Haxhiu.
