Ministrja në detyrë e Drejtësisë, Albulena Haxhiu, ka reaguar ndaj deklaratave të Ministrisë së Drejtësisë së Serbisë lidhur me rastin e zyrtarit serb Igor Popoviq, i cili të premten u dënua nga Gjykata Themelore në Prishtinë me gjashtë muaj burgim për nxitje të përçarjes dhe mosdurimit.
Haxhiu ka thënë se Serbia jo vetëm që po vazhdon të keqpërdor vizitat zyrtare në Kosovë duke ushqyer urrejtje dhe përçarje, por sipas saj, vazhdon propagandën e saj edhe pas marrëveshjeve me institucionet e Republikë Kosovës për pranim të fajësisë si në rastin e Igor Popoviq.
“Ministria e Drejtësisë së Serbisë paska dalë me akuzë tjetër të rreme duke thënë se zyrtari i saj Igor Popoviq e ka pranuar fajësinë nën kushte presioni. Por, në videon më poshtë mund ta shihni se jo vetëm i akuzuari Popoviq, por edhe vet avokati i tij theksojnë se me vullnet të plotë është bërë si pranimi i fajësisë ashtu edhe marrëveshja”, ka shkruar Haxhiu në Facebook, teksa e ka publikuar edhe videon nga procesi gjyqësor.
Ajo ka theksuar se ‘Serbia me kutin e saj gjykon edhe Republikën e Kosovës, por ajo duhet ta kuptojë se Republika e Kosovës është vend demokratik, ku sundon drejtësia dhe dinjititeti njerëzor janë të garantuara e ku pushtetet janë qartësisht të ndara’.
Ministria e Drejtësisë e Serbisë ka thënë të shtunën se marrëveshja për pranimin e fajësisë për nxitje të përçarjes dhe mosdurimit nga zyrtari serb, Igor Popoviq, para gjykatës në Prishtinë ka ndodhur “nën presion, dhe jo me vullnetin e tij të lirë”.
Serbia pretendon se Popoviqi e pranoi “nën presion” fajësinë në Kosovë
