Mesditën e së dielës thirri konferencë për media.
Para gazetarëve, ministrja në detyrë e drejtësisë, Albulena Haxhiu, në fokus pati, gjyqtarin serb të Gjykatës Kushtetuese, Radomir Laban.
Madje, për këtë të fundit, tha se ekzistojnë dyshimet të jetë bashkëpunëtor i Agjencisë së Inteligjencës serbe.
“Serbia asnjëherë s’ka hequr dorë nga përpjekjet për ta destabilizuar Kosovën dhe penguar zhvillimin e saj në të gjitha format e saj. Kohëve të fundit është arritur një sukses i madh i institucioneve tona të sigurisë dhe inteligjencës, në dokumentimin e aktivitetit të spiunazhit e sabotazhit të Serbisë në Kosovë. Një përfundoi me dënim sepse vetë ai e pranoi fajësinë. Serbia ka përdorur historikisht dhe përdor edhe sot agjenturën me qëllim që të shtrijë ndikimin në çdo vend fqinj, e sidomos në Kosovë. Në mesin e këtyre shembujve është edhe ai i Radomir Labanit”, tha Haxhiu.
Vet Radomir Laban, para se ta bëhej gjykatës në Kosovë, ishte dënuar me gjashtë vjet burgim në Serbi.
Pas kësaj, ai iku nga shteti serb dhe strehim gjeti në Kosovë.
Haxhiu ka komentuar të dielën edhe aktgjykimin e fundit të Gjykatës Kushtetuese, rreth mos-konstituimit të Kuvendit të Kosovës.
Por, në këtë konferencë, Haxhiu nuk e bëri të ditur nëse do të kandidoj sërish për kryeparlamentare.
Për këtë post, votat e mjaftueshme nuk arriti t’i marrë në dhjetëra tentime.
Ndryshe, për gjyqtarin serb të Kushtetueses, Radomir Laban, konferencë të jashtëzakonshme thirri të martën, edhe presidentja e shtetit, Vjosa Osmani.
