Ministrja e Drejtësisë, Albulena Haxhiu, thotë se krimi ndaj Astri Deharit, përfshinë një sërë veprash për të cilat ende askush nuk dha përgjegjësi.
Haxhiu, thotë se hetime të ndryshme janë zhvilluar, sikurse edhe përpjekjet për ta fshehur si krim.
“Siç dihet, një sërë anomalish institucionale vërehen menjëherë pas gjetjes së trupit të Astrit Deharit, që nga vonesa e ndihmës mjekësore, tek nxitimi i deklarimeve të Kryepolicit të rajonit të Prizrenit, Nexhmi Krasniqi, e po ashtu Kryeprokurorit i Prokurorisë Themelore në Prizren, Sylë Hoxha”, ka shkruar ministrja në Facebook.
Ajo thotë se provat ekzistojnë dhe gjithçka që duhet është vullneti i policisë dhe prokurorisë për ta zbardhur rastin deri në fund.
“Hetime të ndryshme janë zhvilluar, sikurse edhe përpjekjet për ta fshehur këtë krim. Provat ekzistojnë dhe gjithçka që duhet është vullneti i policisë dhe prokurorisë për ta zbardhur deri në fund këtë rast. Ministria e Drejtësisë ka bërë gjithçka që lejojnë kompetencat e saj. I mbetet institucioneve të drejtësisë të veprojnë dhe të sjellin rezultate ndaj këtij krimi ende të errësuar”, ka shkruar tutje Haxhiu.
Sipas ministres së Drejtësisë, drejtësia për Astritin duhet të ndodhë, që siç thotë ajo nuk mund të vonohet më gjatë.
“Drejtësia për Astritin duhet të ndodhë! Ajo nuk mund të vonohet më gjatë”.
Sot, bëhen shtatë vjet nga vdekja e Astrit Deharit. Aktivisti i Lëvizjes Vetëvendosje, vdiq më 5 nëntor 2016 në Burgun e Prizrenit, në rrethana ende të paqarta./teve1.info/
