Kryetarja e sapozgjedhur e Kuvendit të Kosovës, Albulena Haxhiu, ka falënderuar deputetët për besimin e dhënë, duke premtuar se do ta ushtrojë detyrën me përgjegjësi të lartë kushtetuese dhe me përkushtim të plotë.
Në fjalën e saj pas zgjedhjes, Haxhiu ka theksuar peshën që mbart ky post dhe rëndësinë e funksionimit të Kuvendit si institucion përfaqësues i të gjithë qytetarëve.
“Më lejoni t’iu falënderoj për besimin e dhënë në udhëheqjen e legjislaturës së dhjetë të Kuvendit të Kosovës. Sot e marr këtë detyrë me vetëdije të plotë për peshën kushtetuese që ajo e mbart dhe këtë besim do ta nderoj me punë të përditshme, me transparencë, por po ashtu edhe me përkushtim të plotë. Kuvendi është shtëpia politike e të gjithë qytetarëve tanë, edhe atyre që pajtohen me ne, por edhe atyre që mendojnë ndryshe, sepse shteti u shërben të gjithëve,” ka deklaruar Haxhiu.
Ajo ka nënvizuar se prioritet i saj do të jetë garantimi i funksionimit të Kuvendit me dinjitet, transparencë dhe respekt të ndërsjellë, në përputhje të plotë me Kushtetutën e Republikës së Kosovës.
“Detyra ime do të jetë që të siguroj që Kuvendi të funksionojë me dinjitet, transparencë dhe me respekt të ndërsjellë, në përputhje të plotë me Kushtetutën. Do të sigurohem që secili prej jush ta gjejë hapësirën e vet këtu me të njëjtin respekt, ngase një Kuvend funksional është parakusht për një shtet të fortë dhe një demokraci të qëndrueshme,” është shprehur ajo.
