Ministrja e Drejtësisë, Albulena Haxhiu, e ka quajtur skandaloz deklarimin e Prokurorisë Themelore në Prishtinë se nuk ka lëshuar autorizim për bastisjet e së mërkurës në objektet e strukturave paralele.
Sipas Haxhiut në vend që prokurorët të vepronin shumë vite më parë dhe t’i mbyllnin zyrat e strukturave ilegale ata siç është shprehur ajo ‘nga zyrat e tyre lëshojnë komunikata kundër veprimeve të ligjshme dhe të drejta të policisë’.
“Çfarë deklarimi skandaloz i Prokurorisë Themelore në Prishtinë. Në vend që të vepronin shumë vite më parë, dhe t’i mbyllnin zyrat e strukturave ilegale ata nga zyrat e tyre lëshojnë komunikata kundër veprimeve të ligjshme dhe të drejta të policisë. A ka kush që i kupton këta zyrtarë të shtetit që mbajnë emrin prokurorë? Në shërbim të kujt janë?” , ka shkruar ajo në Facebook.
Ndryshe, Policia e Kosovës në bashkëpunim me institucionet kompetente të mërkurën ka realizuar një aksion policor në disa rajone të Kosovës.
Ministri i Brendshëm, Xhelal Sveçla ka njoftuar se janë mbyllur strukturat paralele “kriminale” të Serbisë në Republikën e Kosovës.
Sipas ministrit, komunat paralele të Serbisë janë mbyllur në Lipjan, Obiliq, Prishtinë, Fushë-Kosovë, Vushtrri, Novobërdë, Kamenicë, Viti, Rahovec, Skënderaj si dhe posta e zyreve tatimore ilegale.
Ndërkaq, Prokuroria Themelore në Prishtinë ka thënë se nuk ka lëshuar autorizim për bastisjet në objektet e strukturave paralele./teve1.info/
Prokuroria thotë se nuk ka lëshuar autorizim për bastisjet në objektet e strukturave paralele
