Ish-komandanti i Ushtrisë Çlirimtare të Kosovës, Haxhi Shala sot është dërguar për në Hagë. Avokati i tij ka treguar për televizionin se bastisja e shtëpisë dhe arrestimi i tij janë të kundërligjshme. E nga Organizata e Veteranëve të Luftës thonë se këto arrestime dhe bastisje janë një spektakël nga kjo gjykatë që siç thonë është kundër interes të Kosovës.
Mëngjesi i së hënës, hetuesit e Zyrës së Prokurorit të Specializuar i gjeti në fshatin Banjë të Malishevës.
Aty u krye një bastisje në shtëpinë e ish luftëtarit të Ushtrisë Çlirimtare të Kosovës, Haxhi Shalës i njohur si komandant “Topi”.
Pas bastisjes, ai u dërgua në bazën e EULEX-it në Fushë Kosovë e ku për orë të tëra u intervistua, teksa të martën u ekstradua për në dhomat e paraburgimit në Hagë.
E avokati i tij, Xhevdet Smakiqi po e konsideron si të kundërligjshme një bastisje të tillë.
Derisa tregon se çfarë u sekuestrua, ai thotë se Shalës i janë ndërprerë komunikimet me familjarët.
E këto arrestime dhe bastisje, po i kundërshtojnë nga Organizata e Veteranëve të Luftës ku po konsiderojnë se kjo Gjykatë është kundër interesit të shtetit të Kosovës.
Anëtari i Kryesisë së OVL – UÇK thotë se qëllimi kryesor i Speciales është që t’i mbajë padrejtësisht në Hagë ish – krerët e UÇK-së.
Sipas Ligjit për Dhomat e Specializuara brenda afatit prej 72 orësh Shala duhet të prezantohet në seancën dëgjimore dhe gjyqtari i procedurës paraprake duhet të vendosë se a do t’i vazhdohet paraburgimi. Ish-komandanti i UÇK-së është arrestuar nën dyshimin për pengimin e drejtësisë dhe ndikimin tek dëshmitarët.
