Profesori i ekonomisë, Medain Hashani ka kundërshtuar Qeverinë për ndarjen e 11 milionë euro lidhur me krizën energjetike, gjegjësisht mbulimin e pagesës për familjet e cenueshme. Këtë, Hashani e quan “dembellëk” në sferën e punësimit dhe keqmenaxhim të parasë së taksapaguesve.
Ndërsa tepricat buxhetore, ai i konsideron paaftësi të Qeverisë për t’i shpenzuar ato në investime kapitale.
“Nuk duhet të mendojmë se kjo Qeveri të ketë një buxhet të masave sociale siç është duke i ndërmarr, ku buxheti i vitit 2024 është thuajse 1/3 është e ndarë për subvencione sociale që në një mënyrë ka kryer një lloj ‘dembellëku’ në aspektin e punësimit. Unë jam kundër ndarjes së subvencioneve për arsye se njëfarë mënyre është edhe një keqmenaxhim i parave të taksapaguesve të Kosovës, andaj tepricat të cilat janë krijuar nga kjo qeveri mund të quhen para te keqmenaxhuara”, ka thënë ai.
Hashani është shprehur se këto mjete do të ishte më mirë sikurse të investoheshin diku tjetër.
“Nëse një qeverie i teprojnë miliona euro në buxhet ato milionë e i shpërndan si subvencione kjo tregon paaftësinë e asaj qeverie në menaxhimin e investimeve kapitale të cilat multiplikohen në aspektin ekonomik, dhe krijojnë vende të reja pune, pagesa shtesë të tatimit të pagës, prandaj këto mjete mendoj se duhet të menaxhohen dhe implikohen duke i orientuar në investime kapitale në subvencione për ndërmarrje private të cilat krijojnë vende të reja pune e jo të jepen si skema sociale”, u shpreh ai./ EO/
