Enver Hasani, ish-kryetar i Gjykatës Kushtetuese është shprehur i sigurt se faktori ndërkombëtar nuk do të ndërdyjë në zgjedhjen e presidentit të Kosovës.
Ai ka thënë se nëse presidentja aktuale, Vjosa Osmani ka nënshkruar anëtarësimin në Bordin e Paqes të presidentit Trupm për kalkulime është logjikë naive.
“Zgjedhje e presidentit të Kosovës është ekskluzivisht çështje e dinamikave të brendshme politike. Jam i sigurt, asnjë ndërhyrje nga jashtë. Nëse kalkulimet e znj.Osmani kanë qenë që vizita ose anëtarësimi, mendoj që është naive ajo logjikë”, ka thënë ai në emisionin “Këndi i Debatit” në Tëvë1.
Hasani ka dhënë vërejtje sa i përket punës së Osmanit,duke thënë se ka bërë shkelje Kushtetuese, po aq sa Qeveria.
Ai ka theksuar se shkeljet Kushtetuese nga presidenti janë më të rënda se ato që i bënë ekzekutivi.
“Mendoj që shkeljet e Kushtetutës,mosrespektimi i Kushtetutës dhe i ligjit nga ana e presidentes Osmani ka qenë i barabartë, nëse jo më shumë se ekzekutivi i Kosovës. Dhe tjetër është përgjegjësia e ekzekutivit në shkeljet e Kushtetutës dhe i presidentit. Institucionet e vitale të shtetit, siç është Prokuroria kanë funksionuar pesë vjet me ushtrues detyre, kjo është e pafalshme, ka sulmuar anëtarë të gjykatave të rregullta dhe anëtarë të Gjykatës Kushtetuese, në mënyrën më brutale të mundshme”, është shprehur Hasani.
Për ish- kryetari e Gjykatës Kushtetuese, Vjosa Osmani është një prej shkaktarëve të pezullimit të dialogut strategjik me Shtetet e Bashkuara të Amerikës.
