Kandidati për deputet nga rradhët e PDK-së, Nait Hasani ka thënë se deklarata e kryeministrit Albin Kurti që partitë opozitare do të “plaken” e “rrokaten” në opozitë tregon se Kurti do të shkojë në opozitë.
Hasani në emisionin “Info Nata” në Tëvë1 ka thënë se kjo gjuhë tregon po ashtu panikun Kurtit për siç ka thënë ai ‘humbjen e pushtetit të tij gradualisht’.
“Nuk kam koment për këtë sjellje, për këtë gjuhë, kjo tregon që ai do të shkojë në opozitë. Vetëm forma e shprehjes, mimika e shprehjes tregon humbjen e besimit, tregon ashpërsinë për ti mbuluar humbjet, pra dëshiron ta mbulojë vjedhjen, korrupsionin, pasigurinë, dëshiron ti mbulojë të gjitha ato me formën e sjelljes së tillë. Kemi parë mjaft këso komentesh të fushatave të ndryshme, të njerëzve të ndryshëm. Të njëjtën e kam parë në Shqipëri, gjuhën e Berishës, kjo është gjuha e Berishes, të njëjtën gjuhë e ka përdorur Berisha atje me këtë ashpërsi, me këto forma se do të plaken në opozitë, partitë nuk plaken sepse vijnë gjenerata e reja. Kjo tregon panikun e tij që e sheh se është duke e humbur pushtetin e tij gradualisht, ndër këmbë po i rrëshqet pushteti dhe tash me këtë gjuhë, me këtë marrje të zërit ai bërtet duke kërkuar për ti mbuluar edhe e shoh që nuk mundet ti mbulojë”, ka thënë Hasani.
Kurti të dielën në tubimin elektoral në Mitrovicë tha se partitë opozitare do të “plaken” e “rrokaten” në opozitë dhe se “nuk do të kthehen më në pushtet”.
“Të dashur qytetarë të Mitrovicës, për çka e kanë përdorë këta që tash janë në opozitë dikur aleancën me Perëndimin? E kanë përdorë, e kanë keqpërdorë aleancën me Perëndimin për ta ambalazhu ose hajninë ose tradhtinë e tyre. Prandaj, prandaj ata u larguan nga pushteti dhe prandaj ata nuk do të kthehen më në pushtet. Aleanca me Perëndimin, partneriteti me Perëndimin, miqësia me Perëndimin, përdoret për ta forcuar ushtrinë, e kurrë për ta ambalazhuar hajninë apo tradhtinë siç bënë ata që dikur ishin në pushtet e tash janë në opozitë e do të plaken në opozitë, e do të rrokaten në opozitë”, tha Kurti.
