Kandidati për deputet nga radhët e Partisë Demokratike të Kosovës, Nait Hasani ka thënë se fitues i zgjedhjeve do të jetë ai që arrin t’i sigurojë 61 vota në Kuvend.
E këtë ai ka thënë se do ta arrijë Bedri Hamza, kandidat për kryeministër nga kjo parti.
“Fitues i zgjedhjeve është ai që i bënë 61 deputetë në Kuvendit e Kosovës, jo ai që del i pari në zgjedhje, sepse zgjedhjet janë matematikë. Unë besoj që Bedri Hamza do t’i arrijë 61 numra dhe do të jetë kryeministër. Fitues do të jetë ai që i bënë numrat. Si kryeministër ka me i realizuar premtimet”, ka thënë Hasani në emisionin “Mesditë” në Tëvë1.
Ai ka thënë se beson që do të gjejnë gjuhë të përbashkët me ish – partitë opozitare për formimin e Qeverisë, ndërsa ka thënë se personalisht është kundër një koalicioni me Lëvizjen Vetëvendosje.
“Nuk jam për koalicion me Lëvizjen Vetëvendosje për asnjë çmim. Është e papranueshme për shkak të sjelljeve që kanë pasur në Kuvend”, ka thënë Hasani.
