Emisarët amerikanë e evropian, më 21 tetor sollën në Prishtinë një draft propozim për asociacionin, por deri më tani nuk janë bërë të ditura detajet e përmbajtjes së tij.
Bazuar në interpretimet e aktorëve në bisedime, del se ky propozim është në përputhje me Kushtetutën e Kosovës dhe si i tillë, do t’i nënshtrohet filtrave të Gjykatës Kushtetuese.
E nisur nga ky fakt, ish-anëtari i Gjykatës Kushtetuese, Kadri Kryeziu, thotë se ky propozim nuk paraqet rrezik për rendin kushtetues të vendit.
Ndërsa njohësi i Kushtetutës, Mazllum Baraliu thotë se problematike është edhe mungesa e transparencës në lidhje me përmbajtjen e këtij dokumenti.
Themelimi i asociacionit është pika kryesore që BE i ka vënë Kosovës për zbatim, përderisa Serbisë po i kërkohet njohja de-fakto e shtetit të pavarur të Kosovës.
