Ambasadori i Britanisë së Madhe në Kosovë, Jonathan Hargreaves, kërkon urgjent të konstituohet Kuvendi dhe të formohet qeveria e re.
Ai thotë se liderët e partive duhet të punojnë së bashku për interesin kombëtar.
“Më shumë se dy muaj pasi populli i Kosovës votoi në zgjedhje, urgjentisht duhet një Kuvend dhe qeveri funksionale. Populli ka të drejtë të presë që liderët e tyre politik të punojnë së bashku në interesin kombëtar”, ka shkruar ambasadori Hargreaves.
Sot, për të dytën herë, deputetët kanë dështuar të konstituojnë përbërjen e re parlamentare, të dalë nga zgjedhjet e 9 shkurtit.
Kryesuesi i seancës konstituive, Avni Dehari, ftoi në konsultime përfaqësuesit e partive politike. Por, pas konsultimit, ai tha se nuk ka konsensus se si të vazhdohet tutje, duke njoftuar se seanca do të vazhdojë më 19 prill në orën 12:00./teve1.info/
