Ambasadori i Mbretërisë së Bashkuar në Kosovë, Jonathan Hargreaves, ka vizituar sot disa nga qendrat e votimit në komunën e Drenasit, në kuadër të monitorimit të procesit zgjedhor që po zhvillohet në 38 komuna të vendit.
Pas vizitës në veri të Kosovës, përfshirë Mitrovicën e Veriut dhe Zveçanin, ambasadori britanik u ndal edhe në Drenas, ku u shpreh i kënaqur me pjesëmarrjen e qytetarëve në votime.
“Ndalesa jonë e radhës ishte në Drenas, të lumtur që më shumë njerëz po dalin për të votuar pasdite,” tha ambasadori Hargreaves në një postim në rrjetet sociale.
“Shpresoj që të gjithë kosovarët do ta përdorin të drejtën e tyre për të votuar dhe për të zgjedhur përfaqësuesit e tyre lokalë komunalë,” shtoi ai.
Më herët gjatë ditës, Hargreaves kishte vizituar disa vendvotime në Mitrovicë të Veriut dhe Zveçan, ku përshëndeti angazhimin e qytetarëve në zgjedhje.
“Është e mrekullueshme t’i shohësh njerëzit duke marrë pjesë në këto zgjedhje shumë të rëndësishme për Kosovën, njerëz që e shprehin vullnetin se kush do t’i përfaqësojë ata për çështjet që i shqetësojnë më së shumti në jetën e përditshme,” deklaroi ambasadori britanik.
